कोशी प्रदेश टी–१० क्रिकेटको उपाधि वाइआरसीसीलाई
विराटनगर। प्रथम कोशी प्रदेश दिवा रात्रिकालीन टी–१० क्रिकेट प्रतियोगितामाको उपाधि वाइआरसिसि विराट ब्लास्टर्सले जितेको छ।
विराटनगर महानगरपालिका–६ को आयोजनामा आइतबार सम्पन्न भएको फाइनलमा एनबीएससी लायन्सलाई १० विकेटले हराउँदै वाइआरसीसीले उपाधि जितेको हो।
जितसँगै वाइआरसीसीले नगद ५ लाख रुपैयाँ जितेको छ। उपविजेता बनेको एनबीएससीले २ लाख रुपैयाँमा चित्त बुझायो।
एनबीएससीले दिएको १०६ रनको लक्ष्य वाइआरसीसीले ८.१ ओभरमा विना विकेटको क्षतिमा पूरा गर्यो। उपाधिको लागि वाइआरसीसीका ओपनर खेलाडी देव खनाले आक्रामक ब्याटिङ गरे। उनले २२ बलमा अर्धशतक पूरा गर्दै अविजित ५६ रनको योगदान दिए। उनले ३ छक्का र ७ चौका हिर्काए। विनोद खनालले २७ बलमा ४४ रन बनाए। उनले ४ छक्का र ३ चौका प्रहार गरे।
यसअघि टस जितेर पहिलो ब्याटिङ गरेको एनबीएससीले निर्धारित १० ओभरमा ५ विकेट गुमाउँदै १०५ रन बनाएको हो। जसमा सन्तोष कार्कीले ६ बलमा १६ रन बनाए।
मिनाश थापाले १८ बलमा २४ रन पारी खेल्दा सुभ कंसकाकार ७ बलमा १७ रन बनाए। भीम सार्कीले ३ बलमा १० रन बनाउँदा अन्य ब्याटरले दोहोरो अंक बनाउन सकेनन्।
वाइआरसीसीका बलर भुलावान सहनीले २ विकेट, हेमन्त धामी, विपिन खत्री र रासिद खानले समान १–१ विकेट लिए। प्रतियोगिताको प्लेअर अफ द म्याच वाइआरसीसीका देव खनाल घोषित भए।
एनबीएससीका सन्तोष कार्की प्लेर अफ द सिरिज भए। उनले प्रतियोगिता भरी २८८ रन बनाएका छन्। उनले नगद २५ हजार पाए।
विराटनगर प्यान्थर्स तेस्रो
प्रतियोगिताको तेस्रो विराटनगर प्यान्थर्स भएको छ। विराटनगरले विराटनगर स्पोर्टिङलाई ८६ रनले पराजित गरेको हो। जितसँगै विराटनगर प्यान्थर्सले नगद १ लाख रुपैयाँ पाएको छ। चौथो भएको विराटनगर स्पोर्टिङले ५० हजार पायो।
तेस्रो पोजिसनको लागि भएको खेलमा विराटनगरले निर्धातिर ओभरमा ४ विकेट गुमाउँदै १५७ रन बनाएको हो। जसमा सोनु अन्सारीले २६ बलमा ५० रन बनाए। दिलिप नाथले १५ बलमा ४८ रन पारी खेल्दा समीर कार्कीले १२ बलमा अविजित ३७ रन बनाए।
विराटनगर स्पोर्टिङका बलर सुनिलले २ विकेट, प्रशान्तले १ विकेट लिए। विराटनगरले दिएको १५७ रनको लक्ष्य पछ्याएको विराटनगर स्पोर्टिङले १० ओभरमा ५ विकेट गुमाउँदै ७१ रन मात्रै बनायो। जसमा हरिस यादवले २३ बलमा अविजित ३९ रन बनाए। रितिक कामतले २१ रन बनाए।
विराटनगरका बलर रिजन ढकाल र विसार अहमदले समान २ –२ विकेट लिए। गत सोमबारदेखि सुरु भएको प्रतियोगितामा मुलुकका विभिन्न ७ वटा क्लबको सहभागिता रहेको थियो। विजेता हुने टिमलाई विराटनगर महानगरपालिका प्रमुख नागेश कोइराला, विराटनगर ६ का वडाध्यक्ष अक्षय सहनीलगायतले पुरस्कार वितरण गरे।
