वेस्ट इन्डिजको विजयी सुरूआत

काठमाडौं। वेस्ट इन्डिजले आइसिसी ट्वान्टी-२० विश्वकपमा विजयी सुरूआत गरेको छ।

आइतबार राति सम्पन्न खेलमा वेस्ट इन्डिजले पपुवा न्यूगिनीलाई ५ विकेटले पराजित गरेको हो। पपुवा न्यूगिनीले दिएको १३७ रनको लक्ष्य वेस्ट इन्डिजले ६ बल बाँकी रहँदा ५ विकेट गुमाएर पूरा गर्‍यो।

वेस्ट इन्डिजका रोस्टन चेजले सर्वाधिक ४२ रन बनाए। २७ बल खेलेका उनले ४ चौका र २ छक्का प्रहार गरे। ब्रैन्डन किंग ३४, निकोलस पूरन २७ र कप्तान रोवमन पावेल १५ रनमा आउट हुँदा आन्द्रे रसेल १५ रनमा अविजित रहे।

पपुवा न्यूगिनीका असद भाले सर्वाधिक २ विकेट लिए। आलेइ नाओ, चार्ड सोपर र जोन करिकोको नाममा समान एक विकेट रह्यो।

त्यसअघि गुयानाको प्रोभिडेन्समा टस हारेर पहिला ब्याटिङ थालेको पपुवा न्यूगिनीले निर्धारित २० ओभरमा ८ विकेट गुमाउँदै १३६ रन बनाएको हो।

पपुवा न्यूगिनीका बाउले सर्वाधिक ५० रन बनाए। ४३ बल खेलेका उनले ६ चौका र १ छक्का प्रहार गरे। कप्तान असद भाला २१, चार्ल्स अमिनी १२ र चार्ड सोपरले १० रन बनाउँदा काबुआ वागी मोरेया दुई रनमा अविजित रहे।

वेस्ट इन्डिजका अल्जारी जोसेफ र आन्द्रे रसेलले समान दुई विकेट लिए। अकील हुसेन, रोमारियो शेफर्ड र गुडाकेश मोटीले समान एक विकेट लिए।