खेलकुदमन्त्रीले सन्दीपलाई भेटे

काठमाडौं। आईसीसी ट्वान्टी-२० विश्वकप खेल्न जान भिसा नपाएका नेपाली टोलीका लेग स्पिनर सन्दीप लामिछानेलाई युवा तथा खेलकुदमन्त्री विराजभक्त श्रेष्ठले भेटेका छन्। बिहीबार कीर्तिपुरिस्थित त्रिवि क्रिकेट मैदानको निरिक्षण गर्न पुगेका श्रेष्ठले सन्दीपलाई भेटेका हुन्।

सन्दीप अभ्यासका लागि कीर्तिपुर पुगेका थिए। उनीहरूले केही समय कुराकानीसमेत गरेका थिए। श्रेष्ठसँगै कीर्तिपुर पुगेका राष्ट्रिय खेलकुद परिषद् (राखेप)का सदस्यसचिव टंकलाल घिसिङले पनि सन्दीपसँग केहीबेर कुराकानी गरेका थिए।

सन्दीपलाई अमेरिकी दूतावासले भिसा दिन अस्वीकार गरेको थियो। विश्वकप अमेरिका र वेस्ट इन्डिजमा हुँदै छ। नेपाली टिम अमेरिकामा रहको छ। नेपाली टिमसँग जोडिन सन्दीपले अमेरिकाको भिसा माग गरेका थिए। तर नेपालस्थित अमेरिकी दूतावासले भिसा दिनलाई अस्वीकार गरेको थियो। 

पछिल्लो समय सन्दीप बलात्कारको मुद्दामा कानुनी लडाइ लडिरहेका थिए। उच्च अदालत पाटनले उनलाई बलात्कारको मुद्दामा सफाइ दिएको थियो। 

अदालतबाट सफाइ पाएपछि क्यानले उनीमाथिको निलम्बन फुकुवा गरेको थियो। राष्ट्रिय क्रिकेट टिमका महत्त्वपूर्ण सदस्य रहेका सन्दीप नेपाली टिममा समावेश हुन अमेरिका जाने तयारीमा थिए। 

नेपाललाई विश्वकपमा छनोट गराउन महत्त्वपूर्ण भूमिका खेलेका सन्दीपको भिसा अस्वीकार भएसँगै उनी राष्ट्रिय टिमसँग सहभागी हुने विषय अन्यौलता परेको छ।