शीर्ष स्थानमा फर्कियो बागमती

काठमाडौं। खेल सकिन केही सेकेन्ड बाँकी रहँदा राज भुषालले गोल गरेसँगै बागमती यूथ क्लबले सहिद स्मारक ‘सी’ डिभिजन लिगको अंक तालिकाको शीर्ष स्थानमा फर्किएको छ । 

सातदोबाटोस्थित एन्फा कम्प्लेक्समा मंगलबार सम्पन्न खेलमा बागमतीले समाज कल्याण खेलकुद केन्द्रलाई २–१ गोलले पराजित गरेको हो । 

जितसँगै बागमतीले १० खेलमा २३ अंक जोडेको छ । पराजित समाज कल्याण समान खेलबाट १६ अंकका साथ चौथो स्थानमा छ ।

बागमतीको जितमा सिर्जनराज गौतम र राज भुसालले गोल गरे । समाज कल्याणका रोशन क्षेत्रीले गोल फर्काए । खेलको तेस्रो मिनेटमै सिर्जनको गोलबाट बागमतीले शुरूआती लिएको थियो ।

तर, खेलको ३४औं मिनेटमा समाज कल्याण खेलमा फर्कियो । 

अतिरिक्त समयको आठौँ मिनेटमा बागमतीका राजले गोल गरे । उनले सचु गुरुङले मध्यभागबाट फ्रिकिकमार्फत प्रहार गरेको बललाई गोल लाइननजिक रहेका राजले गोलमा परिणत गरे । योसँगै बागमतीले ३ अंक हात पार्यो ।