विराटनगर प्यान्थर्सको विजयी शुरूआत

विराटनगर। प्रथम कोशी प्रदेश दिवा रात्रीकालीन टी–१० क्रिकेट प्रतियोगितामा विराटनगर प्यान्थर्स क्रिकेट क्लबले विजयी शुरूआत गरेको छ।

विराटनगर महानगरपालिका–६ को आयोजनामा सोमबारदेखि विराटनगरमा शुरू भएको प्रतियोगिताको उद्घाटन खेलमा विराटनगरको वाईआरसीसी क्रिकेट क्लबलाई ६ रनले हराउँदै प्यान्थर्स विजयी भएको हो। जितसँगै प्यान्थर्सले दुई अंक जोडेको छ। 

टस जितेर ब्याटिङ रोजेको प्यान्थर्सले ७ ओभरमा ७ विकेट गुमाई ८१ रन बनाएको हो। प्यान्थर्सका अलराउन्डर खेलाडी बसिर अहमदले ११ बलमा ३२ रन बनाए। उनले ४ छक्का र १ चौका प्रहार गरे। तुल बहादुर थापाले ८ बलमा १५ रन पारी खेल्दा एमडी अफाकले ६ बलमा ११ रनको योगदान दिए। 

वाईआरसीसीका अभिषेक पाठकले २ ओभरमा १२ रन खर्चेर २ विकेट लिए। हेमन्त धमला र विपिन खत्रीले समान २ –२ विकेट लिए। 

प्यान्थर्सले दिएको ८२ रनको विजय लक्ष्य पछ्याएको वाईआरसीसीले ७ ओभरमा ८ विकेट गुमाई ७५ रन मात्रै बनायो। वाईआरसीसीका ओपन देव खनालले ७ बलमा २० रन बनाए। उनले २ छक्का र २ चौका हिर्काए। 

अभिषेक पाठकले ८ बलमा २८ रनको योगदान दिए। उनले तीन छक्का र १ चौका प्रहार गरे। विनोद भण्डारीले १२ बलमा १० रन बनाउँदा अन्य वाईआरसीसीका अन्य ब्याटरले दोहोरो अंक बनाउन सकेनन्। 

प्यान्थर्सका अलराउन्डर खेलाडी बसिर अहमदले घातक बलिङ गरे। उनले २ ओभरमा ८ रन खर्चेर ४ विकेट लिए। उनी खेलको प्लेर अफ म्याच घोषित भए। साहब आलम र आयुष तिम्सिनाले समान १ –१ विकेट लिए। 

पहिलो दिन चार वटा खेल हुँदैछ। अहिले दोस्रो खेल एनबीएससी लायन्स र फुलबारी क्रिकेट क्लबबीच खेल हुँदैछ। दिवा रात्रीकालीन प्रतियोगिता सञ्चालनका लागि विराटनगर ६ बरमपुरामा १२ लाखको लागतमा बाँसको खम्बामा अस्थायी फ्लडलाइटको व्यवस्था गरेको छ।

विराटनगर ६ का वडाअध्यक्ष अक्षय सहनीका अनुसार विजेता टिमले ५ लाख, उपविजेताले २ लाख, तेस्रोले एकलाख र चौथो हुने टिमले ५० हजार पुरस्कार पाउने छ। 

प्रतियोगिताको म्यान अफ द सिरिजलाई २५ हजार, हरेक म्याचको म्यान अफ द म्याचलाई तीन हजार र एक ओभरमा ६ छक्का हान्ने ब्याटरलाई पुरस्कारस्वरुप वासिङ मेसिनको व्यवस्था गरिएको छ।