नामिबियासँगको वार्मअप खेलमा अस्ट्रेलियाले ९ खेलाडी मात्रै उतार्ने

काठमाडौँ। क्रिकेट अस्ट्रेलिया (सीए) ले इन्डियन प्रिमियर लिग (आईपीएल) मा सहभागिता जनाएका खेलाडीहरूलाई परिवारसँग समय बिताउनको लागि छोटो ब्रेक दिएको छ। उनीहरू विश्वकप अघि नै टोलीमा फर्किने छन्। 

त्यसैका कारण मंगलबार नामिबियासँगको वार्मअप खेलका लागि अस्ट्रेलियासँग ९ खेलाडी मात्रै उपलब्ध हुनेछन्। त्यसपछि अस्ट्रेलियाले बिहीबार वेस्ट इन्डिजसँग खेल खेल्ने छ।

आईपीएलमा ह्यामस्ट्रिङको चोटबाट निको भएका अस्ट्रेलियाका कप्तान मिचेल मार्स पनि बलिङ गर्न तयार छैनन्। आईपीएल फाइनलमा प्याट कमिन्स , ट्राभिस हेड र मिचेल स्टार्क सहभागी थिए। 

रोयल च्यालेन्जर्स बेंग्लोरको टोलीमा रहेका ग्लेन म्याक्सवेल र क्यामरुन ग्रीनले प्लेअफ खेलेका थिए। यी सबै खेलाडी भारतबाट अस्ट्रेलिया फर्किने छन्।  त्यसपछि ५ जुनमा ओमानसँगको विश्वकप खेलअघि वेस्ट इन्डिज पुग्नेछन्। लखनउ सुपर जायन्ट्सका मार्कस स्टोइनिस पनि अहिलेसम्म वेस्ट इन्डिज पुगेका छैनन्।