रहमान एक्लैले ६ विकेट लिएसँगै बंगलादेश विजयी

काठमाडौँ। मुस्तिफिजुर रहमान एक्लैले ६ विकेट लिँदा अमेरिकासँगको ३ टी-२० आई शृंखलाको अन्तिम खेलमा बंगलादेश विजयी भएको छ।

शनिबार सम्पन्न खेलमा बंगलादेश १० विकेटले विजयी भएको हो। योसँगै शृंखला अमेरिकाले २-१ ले जितेको छ। बिहीबार राति सम्पन्न दोस्रो खेलमा बंगलादेशलाई ५ रनले पराजित गर्दै अमेरिकाले एक खेलअगावै शृंखला २-० ले जितेको थियो। त्यसअघि मंगलबार सम्पन्न पहिलो खेलमा अमेरिका ५ विकेटले वियजी भएको थियो।

अमेरिकाले दिएको १०५ रनको लक्ष्य पछ्याएको बंगलादेशले ११.४ ओभरमा कुनै विकेट नगुमाई १०८ रन बनायो। बंगलादेशका तन्जिद हसनले सर्वाधिक ५८ रन बनाए। ४२ बल खेलेका उनले ५ चौका र ३ छक्का प्रहार गरे। सौम्य सरकारले २८ बलमा ४३ रन बनाए।

त्यसअघि प्रेरी भ्यू क्रिकेट कम्प्लेक्समा टस हारेर पहिला ब्याटिङ थालेको अमेरिकाले निर्धारित २० ओभरमा ९ विकेट गुमाउँदै १०४ रन बनाएको थियो।

अमेरिका एन्ड्रयस गौसले सर्वाधिक २७ रन बनाए। कोरी एन्डर्सन १८, शउन जहान्गिर र शैडली भान शाल्विकले १२ रन बनाउँदा अन्य ब्याटर चल्न सकेनन्।

बंगालदेशका मुस्तिफिजुर रहमानले सर्वाधिक ६ विकेट लिए। ४ ओभर बलिङ गरेका उनले १ मेडनसहित १० रन खर्चिए। तनजीम हसन सकिब, सकिब अल हसन र रिशाद हुसेनले १/१ विकेट लिए।