‘बंगलादेशलाई जित्नु संयोग होइन, विश्वकपमा यस्तै अपसेट ल्याउँछौँ’

काठमाडौँ। अमेरिकी तीव्रगतिका बलर अली खानले बंगलादेशविरुद्धको ३ खेलको टी–२० शृंखला एक खेलअगावै जित्नु संयोग मात्र नभएको बताएका छन्।

टोली निकै सन्तुलित रहेको बताउँदै उनले यस्तै ‘अपसेट’ आफ्नो टोलीले आगामी आईसीसी टी–२० विश्वकपमा पनि गर्ने विश्वास व्यक्त गरेका छन्।

‘हामी भोकाएका छौँ र जस्तोसुकै चुनौतीको सामना गर्न तयार छौँ। परिवर्तन गर्ने र हाम्रो आवश्यकताअनुसार समायोजन गर्ने समय हो। टोली निकै सन्तुलित देखिन्छ र खेलाडीमा पनि जितको भोक छ। मलाई विश्वास छ, यसपटक अमेरिकाले पक्कै पनि केही उथलपुथल ल्याउनेछ,’ उनले भने।

बिहीबार राति सम्पन्न दोस्रो खेलमा बंगलादेशलाई ५ रनले पराजित गर्दै अमेरिकाले २-० ले शृंखला जितेको थियो। त्यसअघि मंगलबार सम्पन्न पहिलो खेलमा अमेरिका ५ विकेटले वियजी भएको थियो।

‘ठूलो टोलीविरुद्ध जित्दा धेरैले कहिलेकाहीँ यसलाई संयोग भन्छन्। तर, एउटै शृंखलामा पटक–पटक पराजित हुनु संयोग मात्र होइन, उनी भन्छन्, यदि हामीले अवसर पायौँ भने हामी आफ्नो प्रतिभा र सीप पनि देखाउन सक्छौँ। हामी अमेरिकालाई विश्व क्रिकेटको मानचित्रमा राख्न चाहन्छौँ।’

यसअघि अमेरिकाले टी–२० शृंखलामा क्यानडालाई ४–० ले हराएको थियो। घरेलु टोलीले यही जुन २ मा विश्वकपको उद्घाटन खेलमा अमेरिकाले क्यानडासँग खेल्नेछ। समूह ‘ए’ मा अमेरिका र क्यानडासँगै भारत, पाकिस्तान र आयरल्यान्ड रहेका छन्।