पाकिस्तानको विश्वकप खेल्ने टोलीमा ५ नयाँ खेलाडी

काठमाडौँ। पाकिस्तान क्रिकेट बोर्ड (पीसीबी) ले अमेरिका र वेस्ट इन्डिजको संयुक्त आयोजनामा हुने आईसीसी टी–२० विश्वकपका लागि १५ सदस्यीय टोली घोषणा गरेको छ। 

चोटपछि फर्किएका बलर हरिस रउफले टोलीमा स्थान पाएका छन् भने बाबर आजम कप्तान हुनेछन्। सन् २०२१ र २०२२ पछि यो तेस्रो टी–२० विश्वकप हो, जसमा बाबर कप्तानीमा देखिनेछन्। उनी नियमित भए पनि यसपटक टिममा निकै परिवर्तन भएको देखिन्छ। 

२०२२ को विश्वकप खेल्दाको र अहिलेको टोलीमा धेरै परिवर्तन भएको छ।२०२२ को टोलीमा रहेका ८ खेलाडीले यसपटक आफ्नो स्थान बनाउन सकेका छैनन्। यसपटक ५ नयाँ खेलाडीले पहिलो पटक विश्वकप खेल्दैछन्।

सन् २०२२ को विश्वकप खेलेका ७ खेलाडीले भने टोलीमा आफ्नो स्थान पक्का गरेका छन्। यसमा कप्तान बाबरबाहेक मोहम्मद रिजवान, इफ्तिखार अहमद, शादाब खान, शाहीन अफ्रिदी, नसीम शाह र हरिस रउफ रहेका छन्। त्यतिबेलाको विश्वकप टोलीमा विकेटकिपर मोहम्मद हरिस, शान मसूद, हैदर अली, खुशदिल शाह, मोहम्मद नवाज, आसिफ अली, मोहम्मद वासिम र मोहम्मद हसनैन थिए। 

हरिस, मसुद, हैदर, खुशदिल र आसिफ ब्याट्सम्यान थिए। नवाज त्यही अलराउन्डर हुन्, जसले भारतविरुद्ध अन्तिम ओभर बलिङ गरेका थिए। वासिम र हसनैन फास्ट बलर हुन्। फखर उक्त टोलीमा थिए तर चोटका कारण उनी प्रतियोगिताअघि नै बाहिरिएका थिए। 

आजम रिजवानको ब्याकअप हुनेछन्। योसँगै साम अयुब, फखर जमान, उस्मान खान, इमाद वासिम, अबरार अहमद, मोहम्मद आमिर र अब्बास अफ्रिदी यस वर्षको प्रतियोगिताका लागि टिममा छनोट भएका छन्। पाकिस्तानको विश्वकप टोलीमा ४ ब्याट्सम्यान, २ विकेटकिपर, ३ स्पिन अलराउन्डर, १ स्पिनर र ५ तीव्रगतिका बलर छन्। तर, यो टोलीमा रिजर्भ खेलाडी राखिएको छैन। 

पाकिस्तानी टोली सन् २००७ मा शोएब मलिकको कप्तानीमा र २०२२ मा बाबर आजमको कप्तानीमा फाइनलमा पुगेको थियो। सन् २००९ मा टोलीले युनिस खानको कप्तानीमा उपाधि जितेको थियो। 

सन् २०१०, २०१२ र २०२१ मा पाकिस्तान अन्तिम चारमा पुगेको थियो। पाकिस्तानले ६ जुनमा अमेरिकासँगको खेलबाट आफ्नो विश्वकप यात्रा शुरू गर्नेछ। पाकिस्तानले ९ जुनमा न्यूयोर्कमा भारतको सामना गर्नेछन्। टोलीले ११ जुनमा क्यानडा र १६ जुनमा आयरल्यान्डसँग खेल्नेछ। 

विश्वकपका लागि पाकिस्तानको टोलीः
बाबर आजम (कप्तान), अबरार अहमद, आजम खान, फखर जमान, हरिस रउफ, इफ्तिखार अहमद, इमाद वासिम, मोहम्मद अब्बास अफ्रिदी, मोहम्मद आमिर, मोहम्मद रिजवान, नसीम शाह, साम अयुब, शादाब खान, शाहीन शाह अफ्रिदी, उस्मान खान।