उपाधिका लागि होराइजन र वाईआरसीसी भिड्ने
विराटनगर। तेस्रो संस्करणको मिल्स कप टी –२० क्रिकेट प्रतियोगिताको उपाधिका लागि विराटनगरका होराइजन र वाईआरसीसी क्रिकेट क्लब भिड्ने भएका छन्।
विराटनगर जुट मिलको खेल मैदानमा आइतबार भएको अन्तिम सेमिफाइनल खेलमा भारत विहारको कटिहार क्रिकेट क्लबलाई ४ विकेटले हराउँदै होराइजन उपाधिनजिक पुगेको हो।
उपाधिको लागि होराइजन र वाईआरसीसी मंगलबार दिउँसो १ बजे भिड्नेछन्। यसअघि विराटनगरकै एनवीएससी क्रिकेट क्लबलाई ११६ रनले हराउँदै वाईआरसीसी फाइनलमा पुगिसेको छ।
आइतबारको खेलमा कटिहारले दिएको १७४ रनको लक्ष्य होराइजनले निर्धारित २० ओभरमा ६ विकेट गुमाइ पूरा गर्यो। फाइनमा पुर्याउन होराइजनका ओपनर सन्तोष कार्कीले आक्रामक ब्याटिङ गर्दै अविजित रहेर ७५ रन बनाए। उनले ५३ बलमा ७ छक्का र ४ चौका हिर्काए।
सन्तोष प्लेअर अफ द म्याच घोषित भए। दीपेश कँडेलले १५ बलमा ३० रनको योगदान दिए। उनले २ छक्का र ३ चौका हिर्काए। सोनु अन्सारी र धिरेन शाक्यले समान १८–१८ रन बनाए।
कटिहारका भानु आनन्द र अशोक कुमारले समान २/२ विकेट लिए। अजित राजले १ विकेट लिए। त्यसअघि टस जितेर पहिलो ब्याटिङ रोजेको कटिहारले १९ ओभरमा सबै विकेट गुमाइ १७३ रन बनाएको थियो।
कटिहारका करण कुमारले ३८ बलमा ७४ रन बनाए। उनले ८ छक्का र ४ चौका प्रहार गरे। सरोजले २४ बलमा ३३ रन, अन्सुनी कुमारले २२ रनको योगदान दिए।
होराइजनका फिरोसजन अन्सारी र श्रवण किस्कुले समान ३–३ विकेट लिए। अभिषेक तिम्सिनाले २ विकेट र सन्तोष कार्कीले १ विकेट लिए।
