लिग चरणको अन्तिम खेलमा हैदरावाद विजयी
काठमाडौँ। सनराइजर्स हैदरावादले इन्डियन प्रिमियर लिग (आईपीएल)को लिग चरणको अन्तिम खेलमा पञ्जाब किंग्सलाई पराजित गरेको छ।
आइतबार सम्पन्न दिनको पहिलो खेलमा हैदरावाद ४ विकेटले विजयी भएको हो। जितसँगै दोस्रो स्थानमा उक्लिएको हैदरावादले १४ खेलबाट १७ अंक जोड्यो। हैदरावाद यसअघि नै प्लेअफमा पुगिसकेको छ।
पराजित पञ्जाब समान खेलबाट १० अंक जोड्दै नवौँ स्थानमा रह्यो। पञ्जाबले दिएको २१५ रनको लक्ष्य हैदरावादले ५ बल बाँकी रहँदा ६ विकेट गुमाएर पूरा गर्यो।
हैदरावादका अभिषेक शर्माले सर्वाधिक ६६ रन प्रहार गरे। २८ बल खेलेका उनले ५ चौका र ६ छक्का प्रहार गरे। हाइनरिक क्यालसन ४२, नितिशकुमार रेड्डी ३७ र राहुल त्रिपाठी ३३ रनमा आउट हुँदा अब्दुल समद ११ र सनवीर सिंह ६ रनमा अविजित रहे।
पञ्जाबका अर्शदीप सिंह र हर्षल पटेलले २/२ विकेट लिए। हरप्रीत बराड र शशांक सिंहको नाममा १/१ विकेट रह्यो।
त्यसअघि राजीव गान्धी अन्तर्राष्ट्रिय स्टेडियममा टस जितेर पहिला ब्याटिङ गरेको पञ्जाबले निर्धारित २० ओभरमा ५ विकेट गुमाउँदै २१४ रन बनाएको थियो।
पञ्जाबका प्रभसिमरन सिंहले सर्वाधिक ७१ रन बनाए। ४५ बल खेलेका उनले ७ चौका र ४ छक्का प्रहार गरे। अथर्व तायडे ४६ र राइली रुसो ४९ रनमा आउट हुँदा जितेश शर्मा ३२ रनमा अविजित रहे। हैदरावादका थंगारसु नटराजनले २ विकेट लिए। प्याट कमिन्स र विजयकान्त वियसकान्तले १/१ विकेट लिए।
