जेठ दोस्रो सातादेखि उपत्यकाव्यापी क्रिकेट प्रतियोगिता

काठमाडौँ। एनसीसीएस महिला तथा पुरुष टी२० क्रिकेट प्रतियोगिता जेठ दोस्रो सातादेखि शुरू हुने भएको छ।

भक्तपुर जिल्ला क्रिकेट संघको आयोजनामा हुने प्रतियोगिता १२ देखि १९ गतेसम्म हुन लागेको हो। प्रतियोगितामा पुरुषतर्फ ६ र महिलातर्फ ३ टोली सहभागी हुने आयोजकले जनाएको छ।

पुरुषतर्फ सहभागी भक्तपुर क्रिकेट सेन्टर, भक्तपुर क्रिकेट एक्सिलेन्ट सेन्टर, बल पार्क स्पोर्ट्स इभेन्ट एड्स एकेडेमी, ग्रेट हिमालयन क्रिकेट एकेडेमी ललितपुर, क्रिकेट एक्ससिलेन्ट सेन्टर काठमाडौँ र ओसिस क्रिकेट एकेडेमी काठमाडौँ सहभागी हुने छ। यी टोलीलाई दुई समूहमा विभाजन गरिएको आयोजकले जनाएको छ।

यस्तै, महिलातर्फ काठमाडौँ, ललितपुर र भक्तपुरले सहभागिता जनाउने छन्। डबल राउन्ड रोबिनमा हुने प्रतियोगिताको सम्पूर्ण खेल मूलपानी क्रिकेट मैदानमा हुने छ।

विजेता टोलीले २५/२५ हजार रुपैयाँ प्राप्त गर्ने छन्। उपविजेता टोलीले १५/१५ हजार रुपैयाँ प्राप्त गर्ने छन्।