एपीएफलाई चौथो पटक ललितपुर मेयर्स कपको उपाधि
काठमाडौँ। सुदूरपश्चिम प्रदेशलाई पराजित गर्दै विभायीय टोली एपीएफले चौथो पटक ललितपुर मेयर्स कपको उपाधि जितेको छ।
शनिबार सम्पन्न खेलमा एपीएफ २ रनले विजयी भएको हो। ललितपुरले यसअघि सन् २०२१, २०२२ र २०२३ को उपाधि जित्दै ह्याट्रिक गरिसकेको थियो।
एपीएफले दिएको १५६ रनको लक्ष्य पछ्याएको सुदूरपश्चिमले निर्धारित २० ओभरमा ५ विकेट गुमाउँदै १५३ रन बनायो।
सुदूरपश्चिमलाई अन्तिम ओभरमा ५ रन चाहिएको थियो। रेशा रावलले पहिलो बल डट राखिन्।
दोस्रो बलमा कविता जैशीलाई १ रन दिइन् भने तेस्रो र चौथो बल डट राखिन्। पाँचौँ बलमा लक्ष्मी साउदलाई १ रन दिइन्। अन्तिम बलमा सुदूरपश्चिमलाई जितका लागि ३ रन चाहिएको थियो।
तर, कविता जैशीले १ रनभन्दा बढी लिन सकिनन्। कविताले अविजित रहँदै सर्वाधिक ६७ रन बनाइन्।
४५ बल खेलेकी उनले ७ चौका र ३ छक्का प्रहार गरिन्। कप्तान बिन्दु रावल १९, सावित्री धामी १२ र सम्झना खड्का १० रनमा आउट हुँदा लक्ष्मी साउद २९ रनमा अविजित रहिन्।
एपीएफकी करुणा भण्डारीले सर्वाधिक २ विकेट लिइन्। ४ ओभर बलिङ गरेकी उनले २० रन खर्चिइन्। सुमन बिष्टको नाममा १ विकेट रह्यो।
त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ थालेको एपीएफले निर्धारित २० ओभरमा ४ विकेट गुमाउँदै १५५ रन बनाएको थियो।
एपीएफकी कप्तान सीता रानामगरले सर्वाधिक ७४ रन बनाइन्। ५५ बल खेलेकी उनले ८ चौका प्रहार गरिन्। ओपनर राजमती ऐरी ५० रनमा आउट हुँदा ममत चौधरी १० रनमा अविजित रहिन्।
सुदूरपश्चिमकी ऋतु कौन्जियार, बिन्दु रावल र आधिका पुजराले १/१ विकेट लिइन्।
