सन्दीपबारे पारस भन्छन्- अदालतको फैसलाअनुसार निर्णय लिन्छौँ

काठमाडौँ। नेपाल क्रिकेट संघ (क्यान) सचिव पारस खड्काले अदालतको फैसालाअनुसार लेग स्पिनर सन्दीप लामिछानेको विषयमा निर्णय लिने बताएका छन्।

जिल्ला अदालत काठमाडौँले गरेको फैसलालाई उल्टाउँदै उच्च अदालत पाटनले बुधबार लामिछानेलाई नाबालिग बलात्कारको मुद्दामा सफाइ दिएको छ। योसँगै क्यानले उनीमाथि रहेको निलम्बन फुकुवाको तयारी भने क्यानले गरिसकेको खड्काले जानकारी दिए। यसका लागि बोर्डमा छलफल थालिएको उनको भनाइ छ।

‘सफाइ पाइसकेको जानकारी हामीले पाएका छौँ। योसँगै निलम्बन फुकुवा गर्नेबारे हामीले छलफल थालेका छौँ,’ उनले खेलपाटीसँग भने,‘निलम्बन फुकुवा भएछि विश्वकप खेल्ने सम्भावना रहन्छ। हामी अदालतको फैसलाअनुसार छलफल गरेर निर्णय लिन्छौँ।’

पीडित ‘गौशाला २६’ ले २०७९ भदौ २१ गते काठमाडौँको गौशाला प्रहरी कार्यालयमा लामिछाने विरुद्ध उजुरी दिएकी थिइन्। बलात्कार मुद्दाको थुनछेक बहसमा काठमाडौँ जिल्ला अदालतले सन्दीपलाई पुर्पक्षका लागि थुनामा पठाएको थियो। 

तर, उच्च अदालत पाटनले उनलाई २० लाख रुपैयाँ धरौटीमा छाड्न आदेश दिएको थियो। यद्यपि, सर्वोच्च अदालतले लामिछानेलाई विदेशका प्रतियोगितामा भाग लिन जान पाउने आदेशसमेत गरेको थियो। तर, गत पुस २५ गते काठमाडौँ जिल्ला अदालतका न्यायाधीश शिशिरराज ढकालको इजालासले लामिछानेलाई ८ वर्ष जेल सजाय र ५ लाख रुपैयाँ जरिवाना गर्ने फैसला सुनाएका थिए।

फैसलामा पीडितको कमजोर आर्थिक अवस्थाको फाइदा उठाएर लामिछानेले बलात्कार गरेको जिल्ला अदालतको ठहर थियो। जिल्ला अदालतले उक्त फैसला सुनाएसँगै क्यानले लामिछानेलाई गत पुस २६ गते निलम्बन गरेको थियो।