जोगवनीसँग विराटनगर पराजित

विराटनगर। तेस्रो संस्करणको मिल्स कप टी–२० क्रिकेट प्रतियोगितामा जोगवनीको प्रशान्त क्रिकेट क्लब विजयी भएको छ। 

विराटनगर जुट मिलको खेल मैदानमा बुधबार भएको पहिलो खेलमा घरेलु टिम बिसीसीए विराटनगरलाई ६२ रनले हराउँदै जोगवनी विजय भएको हो। 

जोगवनीले दिएको २५२ रनको विशाल लक्ष्य पछ्याएको विराटनगरले सबै विकेट गुमाइ १८९ रन मात्रै बनाउन सक्यो। विराटनगरका आशुतोष सिंहले २४ बलमा ३९ रन बनाए।  धिरज कामतले २१  बलमा २९ रन बनाउँदा हर्ष यादवले २१ रनको योगदान दिए। 

जोगवनीका अभिशेक राजा, नबित, जयन्त कुमारले समान २/२ विकेट लिए। त्यसअघि टस जितेर ब्याटिङ रोजेको जोगवनीले निर्धारित २० ओभरमा ८ विकेट गुमाई २५१ रन बनाएको हो।

जोगवनीका असिक कुमारले अर्धशतक पूरा गरे। उनले १९ बलमा ५ छक्का र ३ चौका हिर्काउँदै ५० रन बनाए। 

सर्वाधिक रन बनाउने खेलाडी असिक खेलको प्लेअर अफ द म्याच घोषित भए। यशदर्शन कुमारले १८ बलमा ४६ रन पारी खेल्दा राजा बावुले ३७ बलमा ४४ रनको योगदान दिए। उत्तम कुमारले अविजित २३ रन बनाउँदा कोनाइव कुमारले २० रन बनाए। 

विराटनगरका कार्तिक कुमारले ४ ओभरमा ४८ रन खर्चेर ३ विकेट लिए। आयुष कुमारले २ विकेट र आशुतोष सिंहले १ विकेट लिए।