वासिमले जिते ‘आईसीसी पुरुष प्लेअर अफ द मन्थ’ अवार्ड
काठमाडौँ। संयुक्त अरब इमिरेट्स (यूएई)का कप्तान तथा भरपर्दो ब्याट्सम्यान मोहम्मद वासिमले ‘आईसीसी पुरुष प्लेअर अफ द मन्थ’ अवार्ड जितेका छन्।
पुरुषतर्फ पाकिस्तानका शाहीन अफ्रिदी र नामिबियाका गेरहार्ड इरास्मसलाई पछि पार्दै उनी आगामी अप्रिलमा हुने ‘आईसीसी प्लेअर अफ द मन्थ’ अवार्ड जित्ने यूएईका पहिलो खेलाडी बनेका हुन्।
‘आईसीसी मेन्स प्लेयर अफ द मन्थ अवार्ड जित्न पाउनु ठूलो सम्मानको कुरा हो। म विश्वभरका पुरस्कार विजेताहरूको विशिष्ट सूचीमा सामेल हुन पाउँदा रोमाञ्चित छु,’ वासिमले भने, ‘यो पुरस्कार विशेष गरी युएईजस्ता उदीयमान क्रिकेट टोलीका खेलाडीहरूका लागि ठूलो प्रेरणा हो।’
वासिमले आफ्नो कप्तानीमा गत महिना ओमानमा भएको एसीसी प्रिमियर कपको उपाधि दिलाएका थिए। योसँगै यूएईलाई अर्को वर्ष आयोजना हुने एशिया कपमा छनोट भएको छ।
‘मैले विशेष गरी टोलीलाई यहाँसम्म पुर्याउन नेतृत्व गरेँ। व्यक्तिगत रूपमा म खुसी छु। ठूलो खेलमा शतक बनाउनु वास्तवमै एक विशेष क्षण हो। म एशिया कपको लागि उत्सुक छु,’ उनले भने।
अप्रिलमा आयोजना भएको एसीसी पुरुष प्रिमियर कपमा ३० वर्षीय वासिम कुवेतविरुद्ध पहिलो बलमा शून्य रनमा आउट भएका थिए। तर, त्यसपछिका तीन खेलमा यूएईको ब्याटिङ अर्डरको शीर्ष स्थानमा उनले राम्रो प्रदर्शन गरे।
उनले ६५, ४५ र ४८ रनको इनिङ्स खेलेका थिए। वासिमले एसीसी प्रिमियर कपको फाइनलमा ओमानविरुद्ध करिअरको तेस्रो टी–२०आई शतक प्रहार गर्दै यूएईलाई उपाधि जिताएका थिए। उनले शतक पूरा गर्नेक्रममा ६ चौका र १ छक्का प्रहार गरे।
सन् २०२१ को अक्टोबरमा अन्तर्राष्ट्रिय क्रिकेटमा डेब्यु गरेदेखि नै वासिम यूएईको ब्याटिङ अर्डरको एक महत्त्वपूर्ण घटक हुन्। एक दिवसीय क्रिकेटमा ९१ को स्ट्राइक रेटमा उनले १ हजार २८९ रन बनाएका छन्। उनी एक दिवसीय क्रिकेटमा आफ्नो टिमका लागि तेस्रो सर्वाधिक रन बनाउने खेलाडी हुन्।
खेलको सबैभन्दा छोटो ढाँचामा उनले आफ्नो प्रदर्शनमा अझ सुधार गरेका छन्। टी–२० आईमा यूएईका लागि ४० को औसत र १५४.६९ को स्ट्राइक रेटमा उनले १ हजार ९७७ रन बनाएका छन्।
