सुदूरको जितमा सम्झनाको अर्धशतक

काठमाडौँ। सम्झना खड्काको अर्धशतकसँगै सुदूरपश्चिमले ललितपुर मेयर्स कपमा लगातार दोस्रो जित हासिल गरेको छ।

सोमबार सम्पन्न खेलमा सुदूरपश्चिमले कोशी प्रदेशलाई २९ रनले पराजित गरेको हो। सुदूरपश्चिमको यो लगातार दोस्रो जित हो। पहिलो खेलमा सुदूरपश्चिमले डकवर्थ लेविस पद्धति (डीएलएस)मा आयोजक ललितपुर मेयर्स ११ लाई १६ रनले पराजित गरेको थियो।

जितसँगै सुदूरपश्चिमले २ खेलबाट ४ अंक जोडेको छ। शीर्ष स्थानमा रहेको विभागीय टोलीको पनि समान ४ अंक रहेको छ। तर, नेटरननेटमा सुदूरपश्चिम दोस्रो स्थानमा छ।

कोशीको लगातार यो दोस्रो हार हो। कोशी पहिलो खेलमा एपीएफसँग २४ रनले पराजित भएको थियो। सुदूरपश्चिमले दिएको ११३ रनको लक्ष्य पछ्याएको कोशीले निर्धारित २० ओभरमा ७ विकेट गुमाउँदै ९३ रन मात्रै बनाउन सक्यो।

कोशीकी काजोल श्रेष्ठले सर्वाधिक ३३ रन बनाइन्। ४० बल खेलेका उनले २ चौका प्रहार गरिन्। कप्तान अप्सरा बेगम २३ रनमा आउट हुँदा अन्यले दोहोरो अंकमा रन बटुल्न सकेनन्।

सुदूरपश्चिमकी ऋतु कौन्जियार, लक्ष्मी साउद, जानकी थापा र बिन्दु रावलले १/१ विकेट लिइन्।

त्यसअघि कीर्तिपुरस्थित त्रिवि क्रिकेट मैदानमा टस जितेर पहिला ब्याटिङ थालेको सुदूरपश्चिमले निर्धारित २० ओभरमा ८ विकेट गुमाउँदै ११२ रन बनाएको थियो।

सुदूरपश्चिमकी सम्झना खड्काले सर्वाधिक ५४ रन बनाइन्। ५१ बल खेलेकी उनले ४ चौका प्रहार गरिन्। ऋतु कौन्जियार २३ र कप्तान बिन्दु रावल १४ रनमा आउट हुँदा अन्यले राम्रो प्रदर्शन गर्न सकेनन्।

कोशीकी सबनम राई, संगिता राई र हिरनमाया रोयले २/२ विकेट लिइन्। एलिसा खडायतको नाममा १ विकेट रह्यो।