करुणाको कसिलो बलिङ, चल्न सकेन बागमती
काठमाडौँ। करुणा भण्डारीको कसिलो बलिङसँगै विभागीय टोली एपीएफ क्लबले ललितपुर मेयर्स कपमा लगातार दोस्रो जित हासिल गरेको छ।
सोमबार सम्पन्न खेलमा एपीएफ ८ विकेटले विजयी भएको हो। एपीएफको यो लगातार दोस्रो जित हो। पहिलो खेलमा कोशीलाई २४ रनले पराजित गरेको एपीएफ २ खेलबाट ४ अंक जोड्दै शीर्ष स्थानमा छ।
बागमतीको भने यो लगातार दोस्रो हार हो। पहिलो खेलमा बागमती आयोजक ललितपुर मेयर्स ११ सँग ७ विकेटले पराजित भएको थियो।
बागमती प्रदेशले दिएको ७४ रनको लक्ष्य एपीएफले ११ ओभरमा २ विकेट गुमाउँदै पूरा गर्यो। एपीएफकी ममता चौधरीले अविजित रहँदै सर्वाधिक ३५ रन बनाइन्। ३२ बल खेलेकी उनले ५ चौका प्रहार गरिन्।
इन्दु बर्मा १७ र कप्तान सीता रानामगर ११ रनमा आउट हुँदा राजमती ऐरी १० रनमा अविजित रहिन्। बागमतीकी खुसी डंगोलले १ विकेट लिइन्।
त्यसअघि कीर्तिपुरस्थित त्रिवि क्रिकेट मैदानमा टस हारेर पहिला ब्याटिङ थालेको बागमतीले निर्धारित २० ओभरमा ६ विकेट गुमाउँदै ७३ रन बनाएको थियो।
बागमतीकी हेलिसा गुरुङले सर्वाधिक ३१ रन बनाइन्। ५० बल खेलेकी उनले ३ चौका प्रहार गरिन्। खुसी डंगोल १४ रनमा अविजित रहँदा अन्यले राम्रो प्रदर्शन गर्न सकेनन्।
एपीएफकी करुण भण्डारीले ४ विकेट लिइन्। ४ ओभरमा १० रन खर्चेकी उनले बागमतीकी कञ्चन श्रेष्ठ, यशोदा विष्ट, सोनी पाख्रिन र विपशा साहीलाई सस्तैमा पेभिलयन फर्काएकी थिइन्। यस्तै, सीता रानामगरले २ विकेट लिइन्।
