यो सिजन हामीले राम्रो खेल्न सकेनौँ : हार्दिक

काठमाडौँ। मुम्बई इन्डियन्सले इन्डियन प्रिमियर लिग (आईपीएल)मा यो सिजन राम्रो प्रदर्शन गर्न सकेन। मुम्बई यसअघि नै प्लेअफको दौडबाट बाहिरिसकेको छ।

मुम्बईले पछिल्ला दुई खेल जितेर आफ्ना समर्थकलाई उपहार दिने अपेक्षा गरिएको थियो। तर, इडेन गार्डेन्समा मुम्बईको टोली कोलकाता नाइट राइर्डससँग १८ रनले पराजित भयो। वर्षाका कारण प्रभावित खेलमा कोलकाताले पहिले ब्याटिङ गर्दै १५७ रन बनाएको थियो।

जवाफमा मुम्बईले १३९ रन मात्र बनाउन सक्यो। हारपछि कप्तान हार्दिक पाण्ड्याले यसपटक मुम्बई इन्डियन्सले राम्रो क्रिकेट खेल्न नसकेको बताए। ‘सकेसम्म रमाइलो गर्नुपर्छ र राम्रो क्रिकेट खेल्नुपर्छ भने मेरो धारण हो। तर, यो सिजन हामीले राम्रो खेल्न सकेनौँ,’ उनले भने।

मुम्बईलाई पराजित गर्दै कोलकाता सिजनको प्लेअफमा पुग्ने पहिलो टोली बनेको छ। कोलकाताले १२ खेलबाट ९ जितसहित १८ अंक जोडेको छ। यदि मुम्बईले यो खेल जितेको भए कोलकातालाई अर्को खेल जित्नै पर्ने दबाब हुन्थ्यो। तर, मुम्बईले त्यो दबाब सिर्जना गर्न सकेन।

‘आजको खेल हाम्रा लागि कठिन थियो। ब्याटिङ्स युनिटको रूपमा हामीले जग बसाल्यौँ, तर त्यसपछि राम्रो गर्न सकेनौँ,’ उनले भने।

मुम्बईको यो सिजनको नवौँ हार हो। मुम्बईले १३ खेलबाट ८ अंक जोडेको छ। मुम्बई र पञ्जाब किंग्स यसअघि नै प्लेअफको दौडबाट बाहिरिसकेका छन्। अंक तालिकामा चौथो स्थानका लागि चेन्नई सुपर किंग्स, दिल्ली क्यापिटल्स र लखनउबीच प्रतिस्पर्धा भइरहेको छ।