जिम्बाबेसँग बंगलादेश ८ विकेटले पराजित
काठमाडौँ। सिकन्दर राजा र ब्रायन बेनेटको अर्धशतकसँगै जिम्बाबेले ५ खेलको टी-२० आई शृंखलाको अन्तिम खेलमा बंगलादेशमाथि शानदार जित हासिल गरेको छ।
आइतबार सम्पन्न खेलमा भ्रमणकारी टोली जिम्बाबे ८ विकेटले विजयी भएको हो। योसँगै बंगलादेशले शृंखला ४-१ ले जितेको छ।
जिम्बाबे पहिलो खेलमा ८ र दोस्रो खेलमा ६ विकेटले विजयी भएको थियो। तेस्रो खेलमा ९ रनले विजयी भएको बंगलादेश चौथो खेलमा पनि ५ रनले विजयी भएको थियो।
बंगलादेशले दिएको १५८ रनको लक्ष्य जिम्बाबेले १८.३ ओभरमा २ विकेट गुमाउँदै पूरा गर्यो। जिम्बाबेका कप्तान सिकन्दरले अविजित रहँदै सर्वाधिक ७२ रन बनाए। ४६ बल खेलेका उनले ६ चौका र ४ छक्का प्रहार गरे।
ब्रायनले भने ४९ बलमा ५ चौका र ५ छक्कासहित ७० रन बनाए। तडिवनाशे मारुमानी १ रनमा आउट हुँदा जोनाथन कैम्पबेल ८ रनमा अविजित रहे।
बंगलादेशका शाकिब अल हसन र मोहम्मद सैफुद्दीनले १/१ विकेट लिए।
त्यसअघि शेर ए बांग्ला नेशनल स्टेडियममा टस हारेर पहिला ब्याटिङ थालेको बंगलादेशले निर्धारित २० ओभरमा ६ विकेट गुमाएर १५७ रन बनायो।
बंगलादेशका महमुदउल्लाहले सर्वाधिक ५४ रन बनाए। ४४ बल खेलेका उनले ६ चौका र १ छक्का प्रहार गरे। कप्तान नजमुल शान्तो ३६ र शाकिब अल हसन २१ रनमा आउट हुँदा जाकेर अली २४ र मोहम्मद सैफुद्दीन ६ रनमा अविजित रहे।
जिम्बाबेका ब्लेसिंग मुजाराबानी र ब्रायन बेनेटले २/२ विकेट लिए। वेलिंग्टन मसाकाट्जा र ल्यूक जोन्गवेको नाममा १/१ विकेट रह्यो।
