सुदूरपश्चिमको विजयी शुरूआत

काठमाडौँ। डकवर्थ लेविस पद्धति (डीएलएस)मा आयोजक ललितपुर मेयर्स ११ लाई पराजित गर्दै सुदूरपश्चिम प्रदेशले ललितपुर मेयर्स कपमा विजयी शुरूआत गरेको छ।

आइतबार सम्पन्न खेलमा सुदूरपश्चिम १६ रनले विजयी भएको हो। जितसँगै सुदूरपश्चिम अंक तालिकाको शीर्ष स्थानमा उक्लिएको छ। 

सुदूरपश्चिमको २ अंक रहेको छ। पराजित ललितपुरको पनि २ अंक रहेको छ। पहिलो खेलमा बागमती प्रदेशलाई ७ विकेटले पराजित गरेको ललितपुर रेटरनरेटमा सुदूरपश्चिमभन्दा पछाडि परेको छ।

सुदूरपश्चिमले दिएको १२३ रनको लक्ष्य पछ्याएको ललितपुरले ११ ओभरमा २ विकेट गुमाउँदै ४५ रन बनाएको थियो तर, पानी पर्न थालेपछि खेलको छिनोफानो डीएलएसबाट गरिएको हो।

ललितपुरकी लक्ष्मी चौधरी १० र साना प्रविन ६ रनमा आउट भइन्। सरस्वती जीएम १२ र कप्तान पूजा महतो १४ रनमा अविजित रहिन्। सुदूरपश्चिमकी जानकी थापा र ऋतु कौन्जियारले १/१ विकेट लिइन्।

त्यसअघि कीर्तिपुरस्थित त्रिवि क्रिकेट मैदानमा टस हारे पहिला ब्याटिङ थालेको सुदूरपश्चिमले निर्धारित २० ओभरमा ६ विकेट गुमाउँदै १२२ रन बनाएको थियो।

सुदूरपश्चिमकी कप्तान बिन्दु रावलले सर्वाधिक ३० रन बनाइन्। सावित्री धामी १७, लक्ष्मी साउद १५, सम्झना खड्का १३ र रेवती धामी १० रनमा आउट हुँदा कविता जैशी २५ र ऋतु कौन्जियार १ रनमा अविजित रहिन्।

ललितपुरकी कृतिका मरासिनी र आरती महतोले २/२ विकेट लिइन्। पूजा महतो र तिर्सना विश्वकर्माको नाममा १/१ विकेट रह्यो।