नेपालसँग पराजित हुँदै समूह चरणबाटै बाहिरियो साउदी
काठमाडौँ। साविक विजेता नेपालसँग पराजित हुँदै साउदी अरब एसीसी प्रिमियर कपको समूह चरणबाटै बाहिरिएको छ।
समूह चरणको अन्तिम बुधबार नेपालसँग ६ विकेटले पराजित हुँदै साउदी प्रतियोगिताबाट बाहिरिएको हो।
नेपालले समूह बी मा शतप्रतिशत जित हासिल गर्दै ८ अंक जोड्यो। साउदीले ४ खेलबाट २ अंकमात्रै जोड्न सक्यो। साउदीले अन्तिम खेलमा नेपाललाई पराजित गरेको भए समूह उपविजेता बनेर सेमिफाइनल पुग्ने समीकरण तय भएको थियो।
साउदीले दिएको ७४ रनको लक्ष्य पछ्याएको नेपालले ३ बल बाँकी रहँदा ४ विकेट गुमाएर ७५ रन बनायो।
नेपालका गुल्शनकुमार झाले अविजित रहँदै सर्वाधिक ३२ रन बनाए। १९ बल खेलेा उनले २ चौका र २ छक्का प्रहार गरे।
दीपेन्द्रसिंह ऐरीले १७ रन बनाउँदा कप्तान रोहितकुमार पौडेल १६ रनमा अविजित रहे। नेपालका अन्य कुनै ब्याटरले राम्रो प्रदर्शन गर्न सकेनन्।
साउदीका इश्तियाक अहमदले सर्वाधिक २ विकेट लिए। उस्मान नजिब र वाजी उल हसनको नाममा १/१ विकेट रह्यो।
त्यसअघि अल अमेरत क्रिकेट ग्राउन्ड (मिनिस्ट्री टर्फ २) ओमानमा कप्तान रोहितकुमार पौडेलले टस जितेर पहिला फिल्डिङ गर्ने निर्णय गरेका थिए।
ब्याटिङमा उत्रिएको साउदीले निर्धारित ८ ओभरमा ६ विकेट गुमाउँदै ७३ रन बनायो।
साउदीका अब्दुल वाहिदले सर्वाधिक ३७ रन बनाए। १६ बल खेलेका उनले ३ चौका र ३ छक्का प्रहार गरे।
अन्यले भने दोहोरो अंकमा रन बटुल्न सकेनन्।
नेपालका करण केसी र अविनाश बोहराले २/२ विकेट लिए। ललितनारायण राजवंशी र प्रतिश जीसीको नाममा १/१ विकेट रह्यो।
