बटलरको शतक, अन्तिम बलमा राजस्थानको जित

काठमाडौँ। जोश बटलरको शतकसँगै राजस्थान रोयल्सले इन्डियन प्रिमियर लिग (आईपीएल)मा कोलकाता नाइट राइडर्सलाई पराजित गरेको छ। मंगलबार सम्पन्न खेलमा राजस्थानले कोलकातालाई २ विकेटले पराजित गरेको हो।

कोलकाताले दिएको दिएको २२४ रनको लक्ष्य राजस्थानले ८ विकेट गुमाउँदै अन्तिम बलमा पूरा गर्दै जित हासिल गरेको हो।

अन्तिम ओभरमा राजस्थानलाई जितको लागि ९ रन चाहिएको थियो। वरुण चक्रवर्तीको पहिलो बलमा बटलरले छक्का प्रहा गरेका थिए। त्यसपछिका ३ बल चक्रवर्तीले डट राखे।

तर, चक्रवर्तीको पाँचौँ बलमा बटलरले २ रन लिएपछि खेल टाई भएको थियो। अन्तिम बललाई बटलरले स्क्वायर लेग र मिड विकेटको बीचमा प्रहार गर्दै १ रन लिए र राजस्थानलाई २ विकेटको जित दिलाए।

बटलरले अविजित रहँदै ६० बलमा ९ चौका र ६ छक्कासहित १०७ रन बनए। रियान पराग ३४, रोमान पावेल २६, यशस्वी जयसवाल १९ र सञ्जु सामसन १२ रनमा आउट भए।

कोलकाताका हर्षित राणा, सुनिल नारायणर वरुण चक्रवर्तीले २/२ विकेट लिए। वैभव अरोराको नाममा १ विकेट रह्यो।

त्यसअघि इडेन गार्डेनमा टस हारेर पहिला ब्याटिङ थालेको कोलकाताले निर्धारित २० ओभरमा ६ विकेट गुमाउँदै २२३ रन बनायो।

कोलकाताका ओपनर सुनिल नारायणले सर्वाधिक १०९ रन बनाए। ५६ बल खेलेका उनले १३ चौका र ६ छक्क प्रहार गरे।

अंकृष्ण रघुवंशी ३०, आन्द्रे रसेल १३, श्रेयस अय्यर ११ र फिल साल्ट १० रनमा आउट हुँदा रिंकु सिंह २० रनमा अविजित रहे।

राजस्थानका आवेश खान र कुलदीप यादवले २/२ विकेट लिए। ट्रेन्ट बोल्ट र युजवेन्द्र चहलको नाममा १/१ विकेट रह्यो।

जितसँगै शीर्ष स्थानमा रहेको राजस्थानको ७ खेलबाट १२ अंक रहेको छ। दोस्रो स्थानमा रहेको कोलकाताको ६ खेलबाट ८ अंक रहेको छ।