एपीएफ ‘केपी ओली कप’को सेमिफाइनलमा

योगेन श्रेष्ठ 

काठमाडौं । विभागीय टिम एपीएफ केपी ओली कप टी ट्वान्टी क्रिकेटको सेमिफाइनलमा प्रवेश गरेको छ । 

आईतबार समूह बीको खेलमा लुम्बिनीले गण्डकीलाई हराएसँगै समूह विजेताको रुपमा एपीएफ सेमिफाइनल प्रवेश गरेको हो ।

समूह चरणको पहिलो खेलमा एपीएफलाई पहिलो खेलमा गण्डकीले हराएको थियो । दोस्रो खेलमा एपीएफले शनिबार लुम्बिनीलाई हराएको थियो । समूह चरणको अन्तिम खेलमा लुम्बिनीले गण्डकीलाई हरायो । 

समूह बीमा सबै टिमले समान एक जित सहित २ अंक जोडेका छन् । नेट रनरेटका आधारमा एपीएफ सेमिफाइनल पुग्ने समिकरण बनेको हो । 

पहिलो खेलमा एपीएफलाई हराएर शानदार सुरुवात गरेको गण्डकीले दोस्रो खेलको नतिजा लुम्बिनलाई सुम्पियो । लुम्बिनीले गण्डकीलाई ५ रनले हरायो ।

सुरुवाती ब्याटिङ गरेको लुम्बिनीले निर्धारित ओभरमा ८ विकेट गुमाएर १ सय ३ रन बनाएको थियो ।

ध्रुव सुनार र नर सार्कीले समान २३ रन बनाएको लुम्बिनीको इनिङ्समा भरत भण्डारीले १६ र मिर्नाल गुरुङले ११ रन जोडेका थिए ।

गण्डकीका अमृत गुरुङले ३, चन्द्र पौडलले २ तथा विपिन खत्री, सुदीप अर्याल र दिनेश बुढामगरले समान एक एक विकेट लिएका थिए ।

पोखरा क्रिकेट रंगशालामा १ सय ४ रनको सामान्य लक्ष्य पछ्याएको घरेलु टोली ७ बल बाँकी छदै ९८ रनमा समेटियो । तल्लो क्रमका ब्याट्सम्यान सुदीप अर्यालले ३५ रन बनाउनु बाहेक अन्य कुनै खेलाडीले प्रर्दशन गर्न सकेनन् । 

लुम्बिनीका एमडी हुसेनले ४, अजय लुनियाले ३, रमेश कुर्मीले २ तथा अभिषेक गौतमले १ विकेट लिए ।

लुम्बिनीले गण्डकीलाई हराउँदै प्रतियोगिताको सुखद अन्त्य गरेको छ ।