इङ्ल्यान्डमाथि भारतको सहज जित

काठमाडौं । आइसिसी एकदिवसीय विश्वकप क्रिकेटमा भारतले इङ्ल्यान्डमाथि जित निकालेको छ । आइतबार भएको खेलमा भारतले इङ्ल्यान्डमाथि एक सय रनको जित निकालेको हो । 

लखनउमा भएको खेलमा भारतले दिएको २३० रनको लक्ष्य पछ्याएको इङ्ल्यान्डले ३४ ओभर ५ बलमा सम्पूर्ण विकेट गुमाउँदै १२९ रन बनाएको हो । 

इङ्ल्यान्डका लागि लियम लिभिङ्गस्टोले सर्वाधिकर २७ रनको योगदान गरे । त्यस्तै डेविड विलीले अविजित १६, डेविड मलानले १६, मोइन अलीले १५, जोनी बेरिस्टोले १४ रनको योगदान गरे । 

ब्लिङतर्फ भारतका लागि मोहम्मद शामीले सर्वाधिक चार विकेट लिए । त्यस्तै जसप्रित बुमराहले तीन विकेट लिँदा कुलदिप यादवले दुई र रविन्द्र जडेजाले एक विकेट लिए ।

यसअघि टस हारेर ब्याटिङको निम्तो पाएको भारतले निर्धारित ५० ओभरमा नौ विकेट गुमाउँदै २२९ रन बनाएको थियो । 

भारतका लागि कप्तान रोहित शर्माले सर्वाधिक ८७ रनको योगदान गरे । उनले १०१ बलमा १० चौका र ३ छक्का प्रहार गरे । त्यस्तै सूर्यकुमार यादवले ४९ रन बनाउँदा केएल राहुल ३९ र जसप्रित बुमराहले १६ रन बनाए ।

यता इङ्ल्यान्डका लागि डेविड विलीले सर्वाधिक तीन विकेट लिए । त्यस्तै क्रिस वोक्स र आदिल राशिदले समान दुई लिँदा मार्क उडले एक विकेट लिए ।

आजको जितसँगै भारत अघिल्लो चरणको नजिक पुगेको छ । भारतले ६ खेलमा जित निकाल्दै १२ अंक जोडेको छ । यता पराजित इङ्ल्यान्ड ६ खेलमा २ अंक जोडेर पुछरमा छ ।