अत्यासलाग्दो फुटबलरको पलायन 

काठमाडौं । पछिल्लो सिजन शहिद स्मारक ए डिभिजन लिगमा सबैभन्दा धेरै गोल गर्ने नेपाली खेलाडी दिपक सिंह ठकुरी विदेशिएको केहि दिनमै राष्ट्रिय टोलीका अन्य तीन महत्वपुर्ण खेलाडी पनि विदेश पलायन भएका छन्। राष्ट्रिय टोलीबाट लामो समयदेखि खेल्दै आइरहेका अनुभवी खेलाडी पुजन उपरकोटी, डिफेन्डर निशान खड्का तथा राष्ट्रिय टोलीबाट खेलिसकेका नेपाल पुलिस क्लबका विंगर रवि शंकर पासवान अष्ट्रेलिया गएका हुन् ।

खेलाडीहरु एकपछि अर्को गरि बिदेशिन थालेपछि नेपाली खेलकुदको भविष्यका लागि संकट उत्पन्न भएको छ। तर सम्बन्धित निकायहरु यस बिषयमा हेराहेरको अवस्थामा छन्। घरेलु फुटबलको कमजोर संरचना, पर्याप्त भौतिक पूर्वाधारको कमी, निरन्तर प्रशिक्षणको अभाव, न्युनतम सेवा सुविधाबाट बन्चित हुनुनै खेलाडी पलायन हुनुका मुख्य कारण हुन् ।

खेलाडीहरु पलायन भैरहँदा खेलकुद बिकाशको जिम्मेवारी पाएका निकायहरुले यसको रोकथामको लागि कुनै योजना बनाउन सकेका छैनन्। खेलाडी पलायनको मुद्धा यदाकदा संसदमा पनि उठ्ने गरेको छ तर कुनै सुनुवाई भएको छैन। नेपाली खेलकुद नेतृत्व पलायनलाई रोक्न असक्षम देखिएको छ नै समग्रमा सरकारको नीति माथि पनि प्रश्न उठेको छ।  

स्वदेशमा रोजगारी नपाएर तीन चौथाइ युवा वैदेशिक रोजगारीमा जान बाध्य छन्।  तर अहिलेसम्म सरकारले बध्यतात्मक वैदेशिक रोजगार अन्त्य गर्न सकेको छैन। खेल क्षत्रलाई रोजगारमुलक गराई खेलाडीलाई नियमित तलब सुबिधा, प्रशिक्षण जस्ता आधारभूत आवश्यकता पूरा गर्न सके खेलाडीलाई बाँच्नकै लागि विदेशिनुपर्ने बाध्यता आउँदैन  थियो कि ?